સૌ સારાં વાનાં થશે

 

તમારા સારા દિવસો આવી રહ્યા છે.

એન્ટીકરપ્શને રંગે હાથ પકડેલા એ કેસ રદ થશે.

ભ્રષ્ટાચારના તમામ આરોપ નિરાધાર સાબિત થશે.

હરામની કમાઈને આંચ નહીં આવે ,  

જમીનના ભાવ સડસડાટ ઊંચકાશે.

રખડેલ છોકરીનું લગ્ન થશે.

નવી ચારચક્રી ગાડી તમારે આંગણે ઉભી રહેશે.

તમારાં તથાકથિત દુઃખ

શહેરના સીમાડે દૂર !

એમની નિસ્તેજ આંખમાં તેજ

ને કૃશ કાયામાં જોમ આવ્યાં

 

***

 

અર્ધાંગિનીનાં હાથમાં  અખંડ સૌભાગ્ય રેખા

હેલોજન ફુગ્ગા સરખી હળવાશ

હાથમાં નોટોની થોકડી.

 

***

જતાંજતાં છોકરાને કહ્યું

તને ગર્ભશ્રીમંત છોકરી મળશે

એણે પણ પીળી નોટ મારા ખિસ્સામાં સરકાવી.

 

***

કેવી મજા!

ભણ્યા પણ ગણ્યા નહીં એવાને

ઈન્ટલેકચ્યૂઅલ ભામટા મૂરખ બનાવવાની !